Përdoren armët në një gazmend familjar në Dragash, arrestohen dy të dyshuar
Dy persona janë arrestuar më 20.07.2025 në fshatin Zaplluxhë të Dragashit, pas të shtënave me armë zjarri në një aheng familjar.
Lidhur me këtë rast Policia e Kosovës ka njoftuar se më 19.07.2025, rreth orës 22:40 ka pranuar dy video në të cilën shfaqen dy persona duke shtënë me armë zjarri nga ballkoni i një shtëpie, gjatë një ahengu familjar.
Policia thekson se të dyshuarit janë shoqëruar në Stacionin Policor, ndërsa të njëjtit kanë dorëzuar vullnetarisht dy armë, pistoleta me gaz, si dhe tre gëzhoja, për të cilat kanë deklaruar se janë përdorur gjatë ahengut.
“Prokurorja e Shtetit ka urdhëruar që të intervistohen në prani të avokatit dhe ka lëshuar Aktvendim për ndalim në mbajtje deri në 48 orë.” – thuhet në Njoftimin e Policisë.
Ministria e Punëve të Brendshme (MPB) më 03.07.2025 ka lansuar fushatën ndërgjegjësuese kundër të shtënave me armë në ngjarje festive, me titull “Festo me zemër, jo me armë”.
Sipas të dhënave policore numri i rasteve të raportuara nga ana e qytetarëve në Policinë e Kosovës për përdorim të armëve gjatë ahengjeve familjare është rritur për 40% më shumë, në krahasim me vitin e kaluar.
