Pas tri rasteve të vrasjeve në Vushtrri, Policia kryen kontrolle në tri shkolla

Komuna e Vushtrrisë ka marrë masa pas tri rasteve të vrasjeve që ndodhën ditëve të fundit në këtë komunë. 

I pari i Vushtrrisë, Ferit Idrizi, ka njoftuar se sot, më 26.03.2025, me kërkesën e Drejtorisë së Arsimit janë kryer disa kontrolle nga Policia e Kosovës në disa institucione arsimore në Vushtrri.

Sipas Idrizit, kontrollet u realizuan me qëllim të verifikimit të sigurisë dhe për të siguruar që nuk ka kërcënime të mundshme për nxënësit dhe mësimdhënësit. 

Tutje, njoftohet se kontrollet u kryen në tri shkolla të qytetit, si në Shkollën e Mesme Teknike ‘Lutfi Musiqi’, Shkollën e Mesme Profesionale ‘Bahri Haxha’ dhe në Gjimnazin ‘Eqrem Çabej’. 

Gjatë kontrollit në tri shkollat thuhet se nuk është hasur asgjë e dyshimtë. 

“Kjo është pjesë e një serie masash që do të vazhdojmë të implementojmë për të garantuar një mjedis të sigurt për të gjithë qytetarët dhe për të luftuar çdo formë të dhunës dhe pasigurisë. Ne do të qëndrojmë të angazhuar për të ofruar mbështetje dhe siguri për komunitetin tonë”- citohet të ketë deklaruar Idrizi. 

Në vetëm 24 orë, në Vushtrri janë shënuar tre raste të vrasjeve.

Pasditën e së hënës, në fshatin Stanoc, ka ndodhur një vrasje e dyfishtë, ku dyshohet se një burrë ka vrarë me armë zjarri një grua dhe më pas edhe veten.

Rastin e ka konfirmuar për KALLXO.com edhe Prokuroria e Mitrovicës, derisa është njoftuar se hetuesit policorë nën udhëheqjen e prokurorit po vazhdojnë hetimet për veprat penale – vrasje e rëndë, dhe – vetëvrasje.

https://kallxo.com/lajm/vrasja-e-dyfishte-ne-vushtrri-prokuroria-jep-detaje/

Ndërsa, mbrëmjen e së dielës, 23.03.2025, një 19-vjeçar mbeti i vrarë pas të shtënave me armë në qytetin e Vushtrrisë, nga një i dyshuar i moshës së njëjtë.

I dyshuari është arrestuar, ndërsa e ka pranuar fajësinë për vrasjen e bashkëmoshatarit të tij.

Të dyshuarit, B.D., Gjykata e Mitrovicës më 24.03.2025 i ka caktuar masën e paraburgimit prej 1 muaji.