Parandalohet kontrabandë në Aeroportin e Prishtinës, udhëtarëve u gjenden qindra pako të cigareve 

Policia e Kosovës bën të ditur se ditëve të fundit në tri raste të ndara është parandaluar kontrabandë me duhan në Aeroportin “Adem Jashari” në Prishtinë.

Në rastin e parë Policia thotë se në koordinim me Njësitin për Informacion të Pasagjerëve, zyrtarëve të Doganës dhe Policisë është ndaluar një pasagjer në shkuarje për Londër. 

Në valixhet e tij thuhet se janë hasur tetë boksa (shteka) me cigare të llojit Marlboro e kuqe, 116 boksa cigare e llojit Marlboro e kaltër, dy boksa të llojit Lucky Strike, 13 boksa të llojit Marlboro e bardhë, 5 boksa të llojit Philipmorrise dhe  gjithsej 144 boksa me cigare. 

Në rastin e dytë Policia njofton se një pasagjeri në shkuarje për në Angli gjatë kontrollit i janë hasur 18 boksa cigare, prej tyre 17 boksa cigare të llojit Winston dhe një boks cigare e llojit Karelia. 

Ndërsa, gjithsej 220 boksa të cigareve i janë gjetur në dy valixhe një pasagjeri tjetër të fluturimit Prishtinë-Londër.

“Në të tria rastet duhani është konfiskuar dhe me procedurat për raste të tilla janë marrë ekipet e Doganës së Kosovës.” – thuhet në njoftimin e Doganës, të lëshuar sot më 11.04.2025.