Paqartësia globale rrit përkrahjen për fuqizim të raporteve Britani-BE

Respondentët europianë dhe britanikë besojnë se marrëdhëniet më të fuqishme do të ndihmonin të dy palët përballë erërave të reja gjeopolitike, ka treguar një anketim i madh i kryer së fundmi – raporton “Euronews”.

Paqartësia globale, e rritur edhe nga agresioni i vazhdueshëm i Rusisë kundër Ukrainës dhe kthimi i Donald Trumpit në Shtëpinë e Bardhë në Janar, po fuqizojnë përkrahjen në mesin e britanikëve e europianëve për marrëdhënie më të ngushta, edhe nëse kërkohet shkelja e atyre që janë quajtura vija të kuqe – kanë treguar të dhënat e një anketimi.

Gjysma e britanikëve të anketuar besojnë se Qeveria e tyre duhet t’i ketë më prioritet raportet me Bashkimin Europian se me Shtetet e Bashkuara – derisa vetëm 17% e mendojnë të kundërtën. Pasqyrojnë shifrat e një sondazhi të kryer në disa vende, nga grupi i pavarur i mendimit, Këshilli Europian për Marrëdhënie të Jashtme (ECFR).

Britanikët e anketuar besojnë, gjithashtu, se vendi i tyre mund të jetë më efikas në menaxhimin e migrimit, fuqizimit të sigurisë e ekonomisë, luftimit të ndryshmit klimatik e pandemisë së ardhshme; si dhe, përballjen kundrejt Rusisë, SHBA-së dhe Kinës – nëse marrëdhëniet do të ishin më të ngushta me BE-në, përkitazi me këto çështje.

Njëherësh, shumica e respodentëve nga vendet e anketuara të BE-së – Franca, Gjermania, Italia, Polonia dhe Spanja – mendojnë, gjithashtu, se Britania dhe BE-ja duhet të kenë marrëdhënie më të ngushta dhe më të forta sepse do të ndihmonin sigurinë e Europës.

Më shumë se 9,300 persona, të cilët kanë marrë pjesë në një sondazh të kryer online në gjashtë vende, janë pyetur edhe për Ukrainën. Ata kanë spikatur se Qeveria nuk duhet të ndjekë qëndrimin amerikan nëse Trumpi provon ta detyrojë Kievin, që të pranojë koncesione të mëdha kundrejt Rusisë. Në Itali, megjithatë 29% e të anketuarve kanë thënë se Qeveria e tyre duhet të ndjekë qëndrimin amerikan – po aq sa edhe numri i atyre që mendojnë se duhet krejtësisht të kundërtën.

“Është e rëndësishme të pranohet se Brexit-i dhe marrëdhëniet e ardhshme BE-Mbretëri e Bashkuar kanë më shumë peshë për respodentët britanikë se për qytetarët në shtetet e tjera. Por, ka një aprovim të gjerë në opinionin publik europian për t’i rishikuar marrëdhëniet.” – ka thënë Mark Leonard, drejtor dhe bashkëthemelues i ECFR-së. “Mund të ketë dyshime për kushtet speciale për Mbretërinë e Bashkuar në mesin e zyrtarëve dhe Qeverive të BE-së, por sondazhi ka treguar se opinioni publik është më pragmatik.”

Përgatiti: Rexhep Maloku – Kallxo.com