Operacion në Gjilan, arrestohen 21 persona të shpallur në kërkim nga gjykatat

Policia e Kosovës ka njoftuar se gjatë një operacioni të gjerë në Gjilan, janë arrestuar 21 persona të shpallur në kërkim nga gjykatat kompetente.

Sipas PK-së, operacioni është zhvilluar në kuadër të planit operativ për ekzekutimin e urdhër-arresteve gjyqësore, i cili ka qenë aktiv nga 13.05.2025 deri më 13.08.2025.

Sipas njoftimit, personat e arrestuar janë dënuar me masa burgimi nga 1 deri në 5 vite e 6 muaj, për vepra të ndryshme penale, përfshirë: Vrasje në tentativë, trafikim me njerëz, shkaktim i rrezikut të përgjithshëm, blerje, posedim, shpërndarje dhe shitje e paautorizuar e narkotikëve, bashkësi jashtëmartesore me person nën moshën 16 vjeç, vjedhje dhe vjedhje të rënda, si dhe vepra të tjera penale.

“Pas përfundimit të procedurave ligjore, të gjithë të arrestuarit janë dërguar për vuajtjen e dënimit.”

Policia e Gjilanit ka theksuar se do të vazhdojë me përkushtim zbatimin e ligjit dhe arrestimin e personave që ende nuk i janë përgjigjur thirrjeve të gjykatave.