Një person raportohet i zhdukur në Gjilan – Policia gjen veturën pranë pendës së Livoçit

Policia e Kosovës është duke hetuar zhdukjen e një personi 32-vjeçar në Gjilan pasi familjarët kanë raportuar se ai ka dalë nga shtëpia në orët e hershme të mëngjesit të së enjtes më 27.11.2025.

Zëdhënësi i Policisë për rajonin e Gjilanit, Valon Osmani, ka konfirmuar për KALLXO.com se familja ka raportuar rastin në orën 10:05.

“Me datën 27.11.2025, rreth orës 10:05, kemi pranuar informacion nga familjarët se një person mashkull kosovar, i lindur në vitin 1993, ka dalë nga shtëpia rreth orës 07:00 dhe që nga ajo kohë nuk dihet për vendndodhjen e tij” – ka deklaruar Osmani.

Sipas tij, gjatë veprimeve të para hetimore, Policia ka arritur të gjejë veturën e personit të zhdukur.

“Gjatë veprimeve të para hetimore, vetura e personit është gjetur në afërsi të pendës së fshatit Livoq” – ka sqaruar Osmani.

Në vendin e ngjarjes kanë dalë njësitë policore, ekipet e zjarrfikësve dhe të emergjencës, të cilët po punojnë për gjetjen e personit dhe sqarimin e rrethanave.

“Njësitë policore relevante, së bashku me ekipet e Zjarrfikësve dhe të Emergjencës, kanë dalë menjëherë në vendin e ngjarjes dhe janë duke ndërmarrë të gjitha veprimet e nevojshme për sqarimin e rrethanave dhe gjetjen e personit” – ka thënë Osmani.

Ai ka konfirmuar se Prokurori i Shtetit është njoftuar dhe ka udhëzuar nisjen e procedurave.

“Për rastin është njoftuar Prokurori i Shtetit, me vendimin e të cilit është iniciuar rasti ‘Person i zhdukur”- ka përfunduar zëdhënësi i Policisë për Rajonin e Gjilanit, Valon Osmani.