Në 10 ditët e para të gushtit Policia sekuestroi 11 armë në Prizren - FOTO
Policia e Kosovës ka njoftuar se në 10 ditët e para të muajit gusht 2025, në Prizren ka sekuestruar 11 armë zjarri, shtatë prej tyre pistoleta dhe katër të llojit pushkë.
Sipas Policisë, ky kontroll u ndërmor në kuadër të Planit Operativ “Sezoni Veror 2025”, me moton vetëdijesuese “Festo me zemër, jo me armë”.
“Qëllimi kryesor i këtyre veprimeve ka qenë parandalimi i të shtënave festive me armë zjarri në ambiente familjare dhe publike, të cilat paraqesin rrezik të përgjithshëm për jetën dhe sigurinë e qytetarëve” – thekson PK-ja.
Policia tutje njofton se ndaj të dyshuarve është ngritur kallëzim penal për veprat “Mbajtje në pronësi, kontroll ose posedim të paautorizuar të armës” dhe “Shkaktim i rrezikut të përgjithshëm”.
Policia e Kosovës sqaron se do të mbetet e përkushtuar në ruajtjen e rendit dhe sigurisë publike, si dhe në parandalimin e veprave penale, me theks të veçantë në parandalimin e keqpërdorimit të armëve zjarri, që në raste të tilla mund të rezultojë me pasoja të rënda për qytetarët.
“Bashkëpunimi me qytetarët mbetet kyç për suksesin e përbashkët në krijimin e një ambienti të sigurt për të gjithë” – shton Policia
Ministria e Punëve të Brendshme (MPB) më 03.07.2025 ka lansuar fushatën ndërgjegjësuese kundër të shtënave me armë në ngjarje festive, me titull “Festo me zemër, jo me armë”.
Sipas të dhënave policore, numri i rasteve të raportuara nga ana e qytetarëve në Policinë e Kosovës për përdorim të armëve gjatë ahengjeve familjare, është rritur për 40% më shumë në krahasim me vitin e kaluar.
