Ministria e Ekonomisë: 200 familje në nevojë do të përfitojnë nga masa për efiçiencë të energjisë
Ministria e Ekonomisë ka njoftuar se 200 familje në nevojë do të përfitojnë nga masa për izolimin e shtëpisë dhe masa të tjera të efiçiencës deri në vitin 2027 falë projektit “Rruga gjithëpërfshirëse dhe e drejtë drejt vitit 2030: E ardhmja e energjisë së gjelbër”.
Sipas Ministrisë, ky projekt është në kuadër të marrëveshjes në mes Qeverisë së Kosovës dhe Qeverisë së Danimarkës për përkrahje në fushën e energjisë, që do të zbatohet nga UNDP në partneritet me Fondin e Kosovёs pёr Efiçiencё tё Energjisё dhe Ministrisë së Ekonomisë.
“Përfituesit janë identifikuar nga lista e përfituesve të Asistencës Sociale në Ministrinë e Financave, Punës dhe Transfereve (MFPT), bazuar në kritere të përcaktuara nga ekspertët e institucioneve përkatëse.” – thuhet në njoftimin e Ministrisë së Ekonomisë, më 01.10.2025.
Por, Ministria ka bërë të ditur se në mesin e përfituesve përparësi u është dhënë dy kategorive të familjeve: ku kryefamiljari është prind vetushqyes; që kanë persona me aftësi të kufizuar.
“Brenda këtyre kategorive, janë zbatuar kriteret për përzgjedhjen e familjeve: me më shumë pensionistë, me më shumë persona me aftësi të kufizuar, me prindër vetushqyes, që i përkasin komuniteteve jo shumicë, me numër më të madh anëtarësh, me më shumë anëtarë nën 18 vjeç, dhe varësisht nga burimi i energjisë që përdorin.” – njofton ME.
Ministria shton se ky projekt synon të përfshijë deri 200 shtëpi nga lista e përfituesve të ndihmës sociale, deri në vitin 2027.
“Ky është një hap i rëndësishëm drejt një sistemi energjetik më të drejtë, gjithëpërfshirës dhe të qëndrueshëm për Kosovën.” – ka theksuar ME.
