Mbeturinat prapa Fakultetit të Arteve në Prishtinë, nga Komuna premtojnë intervenim (FOTO)

Një grumbull me mbeturina, korniza të drurit, degë të pemëve, letra, kanaçe të pijeve, shishe e gota të plastikës, kartonë e thasë me mbeturina, janë parë afër kontejnerëve për mbeturina të cilat ndodhen në rrugën “Sylejman Vokshi”, prapa Fakultetit të Arteve në Prishtinë.

KALLXO.com ka sjellur pamje të mbeturinave nga vendi i ngjarjes, të cilat janë realizuar më 26.08.2025, rreth orës 10:40.

Në lidhje me këtë çështje KALLXO.com ka kontaktuar Komunën e Prishtinës. Nga ky institucion kanë premtuar intervenim.

Drejtori i Shërbimeve Publike në Komunën e Prishtinës, Bekim Gashi, tha se janë në dijeni për mbeturinat, mirëpo kanë mbetur ta nënshkruajnë një kontratë për largimin e tyre.

Gashi gjithashtu tha se brenda dy javësh ato do të largohen.

“Po, jemi në dijeni. Shumë shpejt do të kemi kontrata me ndërmarrjen ‘Gjelbër’ për mbetje të tilla. Për 2 javë (largohen)”- tha Bekim Gashi për KALLXO.com.