Liverpool fiton me shumë mund ndaj Atleticos, Bayern i fortë për Chelsean

Liverpooli ka marrë një fitore dramatike dhe shumë të vështirë kundër Atletico Madridit, duke triumfuar me rezultat 3-2 në një ndeshje të mbushur me emocione, përmbysje dhe tension deri në minutat e fundit.

“Anfield Road” pa një fillim të zjarrtë nga “The Reds”, të cilët që në minutën e 4-të kaluan në epërsi. Një goditje e fuqishme e Mohamed Salah u devijua nga Andrew Robertson, duke e çuar topin në rrjetë për rezultatin 1-0.

Vetëm dy minuta më vonë, Salah dyfishoi shifrat pas një kombinimi të bukur me Ryan Gravenberch, duke e çuar epërsinë në 2-0.

Atletico Madridi nuk u dorëzua dhe gradualisht e ktheu ndeshjen në lojën e saj. Në minutën e 35-të, Clement Lenglet shkaktoi penallti me prekje të dorës, por pas konsultimit me VAR, gjyqtari e anuloi vendimin duke e lënë Liverpoolin pa rastin e artë për golin e tretë.

Pak para fundit të pjesës së parë, madrilenët u kthyen fuqishëm. Në minutën e 45+3, Marcos Llorente shënoi nga afërsia pas asistimit të Giacomo Raspadorit, duke ngushtuar shifrat në 2-1.

Në pjesën e dytë, Atletico Madridi e rriti presionin dhe u shpërblye në minutën e 81-të, kur Llorente shënoi sërish, këtë herë me një goditje të fortë nga jashtë zonës që u devijua dhe mposhti Alissonin për rezultatin 2-2.

Por Liverpooli nuk pranoi ta mbyllte ndeshjen me barazim. Në minutën e 90+2, Virgil van Dijk u ngrit mbi të gjithë pas një harkimi perfekt nga këndi i Dominik Szoboszlait, duke goditur me kokë për rezultatin vendimtar 3-2.

Liverpooli mori tri pikë e para, ndërsa Atletico Madridi duhet t’i kërkojë në ndeshjet e ardhshme.

Bayerni i fortë për Chelsean, rekordmenët gjerman e nisin mbarë sezonin në Ligën e Kampionëve

Bayern Munich ka triumfuar në ndeshjen e parë të fazës së ligës në Ligën e Kampionëve, teksa ka mposhtur Chelsean me rezultat 3-1.

Vetëm pas 20 minutave lojë ndeshja u zhbllokua, kur pas një hakrimi në zonë nga Michael Olise, Trevoh Chalobah shënoi autogol për epërsinë e vendasve 1-0.

Bayerni nuk u ndal dhe pas shtatë minutave ngriti epërsinë në 2-0, ku kësaj radhe realizoi Harry Kane nga penalltia.

Në minutën e 29-të, Chelsea ngushtoi epërsinë me anë të Cole Palmer që realizoi një gol të bukur pas asistimit nga Malo Gusto.

Pjesa e parë u mbyll me epërsinë e ngushtë të bavarezëve 2-1.

Edhe në pjesën e dytë më të mirë në fushë ishin gjermanët, ku në minutën e 63-të shënuan edhe golin e tretë.

Pas një gabimi nga Malo Gusto, Harry Kane realizoi bukur për rezultatin përfundimtar 3-1.

Në ndeshjen e radhës Bayerni luan në udhëtim te Pafos, derisa Chelsea pret Benfican në Stamford Bridges. /Telegrafi