Lista e futbollsitëve që u ftuan nga Foda për ndeshjet ndaj Zvicrës dhe Suedisë

Federata e Futbollit të Kosovës ka publikuar listën e futbollistëve që trajnerit Franco Foda i ka ftuar për dy ndeshjet e shtatorit, ndaj Suedisë në ‘Fadil Vokrri’ dhe si mysafirë në Zvicër.

Në listë janë përfshirë emra të njohur si Vedat Muriqi, Arijanet Muriç, Milot Rashica, Edon Zhegrova, Amir Rrahmani, Lumbardh Dellova e të tjerë, të cilët pritet të mbajnë peshën kryesore të lojës. Përveç tyre, Foda ka ftuar edhe disa lojtarë të rinj në listën e zgjeruar, mes tyre Faton Maloku, Leard Sadriu, Andi Hoti dhe Donat Rudhani, duke i dhënë një tjetër dimension skuadrës.

I pranishëm do të jetë edhe prurja e re, Leon Avdullahu.

Federata e Futbollit të Kosovës njoftoi se grumbullimi do të fillojë në ditët e para të shtatorit, ndërsa synimi kryesor i ekipit është një start pozitiv në garat kualifikuese për Botërorin e vitit 2026.

Kosova ndeshjen e parë do ta zhvillojë ndaj Zvicrës, ndërsa përballja e dytë do të jetë kundër Suedisë – dy kundërshtarë të vështirë, por ndaj të cilëve Dardanët synojnë rezultat pozitiv.