Kurti bisedon me dy kongresistë amerikanë për fuqizimin e marrëdhënieve Kosovë–ShBA

Kryeministri në detyrë i Kosovës, Albin Kurti, ka takuar sot (24.11.2025) dy kongresistët e Shteteve të Bashkuara të Amerikës, republikanin Mike Turner dhe demokratin Donald Norcross.

Siç njofton Zyra e Kryeministrit, pika qendrore e diskutimeve ishte fuqizimi i marrëdhënieve Kosovë–ShBA, me theks të veçantë në fushën e mbrojtjes.

Kryeministri në detyrë, njoftoi kongresistët Turner dhe Norcross se në katër vitet e fundit mbi 1 mijë pjesëtarë të Forcës së Sigurisë së Kosovës (FSK) kanë marrë pjesë në trajnime në programe ushtarake të ShBA-së, përfshirë edukimin ushtarak në West Point dhe U.S. Army War College.

Ndërsa sa i përket investimeve dhe kapaciteteve mbrojtëse, kryeministri veçoi prokurimin e pajisjeve ushtarake amerikane, përfshirë dhe blerjen e sistemeve anti-tank Javelin.

“Krahas investimeve në mbrojtje, kryeministri u shpreh se Kosova mbetet e palëkundur në orientimin e saj euro-atlantik dhe synimin për anëtarësim në NATO dhe BE, jo vetëm si përfituese nga ombrella e sigurisë, por edhe si kontribuuese në paqen dhe sigurinë në kontinentin evropian”- thuhet në njoftimin e ZKM-së.

Gjatë takimit, Kurti diskutoi edhe për mundësitë e bashkëpunimit në rrafshin ekonomik, sidomos në fushën e energjisë dhe të teknologjisë, por edhe në projekte të mëdha si ato në transportin hekurudhor.

Kurti ka shprehur mirënjohjen e popullit të Kosovës dhe falënderimin e tij për kontributin historik, rolin aktiv dhe mbështetjen e vazhdueshme të Shteteve të Bashkuara të Amerikës ndaj shtetit të Kosovës.

Kongresistët amerikanë janë takuar edhe me presidenten Vjosa Osmani.

Në një pronocim për media, ajo ka deklaruar se “në Kosovë nuk ka pasur e as nuk do të ketë asnjëherë Qeveri antiamerikane”.