Kryeministri polak: Hekurudhat u sulmuan nga dy ukrainas që punonin për Rusinë

Dy shtetas ukrainas, të cilët kanë punuar prej kohësh për inteligjencën ruse, janë identifikuar si të dyshuarit pas dy akteve të sabotimit në rrjetin hekurudhor të Polonisë, ka deklaruar kryeministri polak të martën (18.11.2025), Donald Tusk, raporton BBC

Njëri nga dy të dyshuarit është dënuar tashmë në mungesë për akte sabotimi në Ukrainën perëndimore, ka theksuar Tusk para parlamentit të Polonisë, Sejmit.

Tusk ka vizituar të hënën vendin e një shpërthimi afër Mikas në juglindje të Varshavës, ku u dëmtua linja hekurudhore që shpie drejt kufirit ukrainas, duke e quajtur “akt sabotimi të paprecedentë”.

Një incident tjetër pranë Pulawy ka detyruar një tren plot me njerëz të ndalej papritur dhe pastaj u u hetuan dëme në kabllot ajrore.

Autoritetet polake fillimisht kishin thënë se kishte mundësi të madhe që aktet e sabotimit të jenë urdhëruar nga një “shërbim i huaj”.

Por një zëdhënës i ministrit të Shërbimeve Speciale të Polonisë ka njoftuar të martën se “gjithçka tregon se ato janë shërbime speciale ruse”.

“Qëllimi ishte të shkaktohej një katastrofë hekurudhore” – u ka deklaruar Tusk deputetëve.

Kryeministri polak ka theksuar se nuk do t’ tregojë emrat e dy të dyshuarve pasi kjo mund ta ndërlikojë operacionin, megjithëse u tha deputetëve se njëri jetonte në Bjellorusi dhe tjetri ishte banor i Ukrainës lindore.

Të dy të dyshuarit kishin kaluar në Poloni nga Bjellorusia gjatë vjeshtës dhe tani ishin kthyer atje nëpërmjet pikës kufitare në Terespol në jugperëndim të largët të Bjellorusisë, afër kufirit ukrainas, ka shtuar ai.

Polonia është shtet anëtar i NATO-s dhe i BE-së, dhe rrjeti i saj hekurudhor është bërë jetik për bartjen e furnizimeve me ndihma në Ukrainë prejse Rusia nisi pushtimin e saj në shkallë të plotë në shkurtin e vitit 2022.

Përgatiti: Rexhep Maloku – Kallxo.com