Kallëzimi penal nga Komuna e Prishtinës, jep dorëheqje drejtori i Inspektoratit për Trashëgimi Kulturore

Drejtori i Inspektoratit për Trashëgimi Kulturore i Ministrisë së Kulturës, Rinisë dhe Sportit, Imer Hakaj, ka njoftuar se ka dhënë dorëheqje nga ky post sot, më 07.04.2025.

Ky veprim i tij vjen pas njoftimit për inicimin e kallëzimit penal nga Komuna e Prishtinës ndaj Inspektoratit. 

Ai tutje thotë se beteja për drejtësi ndaj “shkelësve të Ligjit për Trashëgimi Kulturore, për ndërhyrjet e paautorizuara për punimet në rrugën ‘Xhorxh Bush’ në Prishtnë, do të vazhdojnë”. 

“Përgjegjës për të gjitha veprimet e ndërmarra deri më tani jam dhe mbetem vetëm unë, si Drejtor i Inspektoratit për Trashëgimi Kulturore, duke u nisur nga udhëzimi dhe miratimi për inspektim për Inspektorin e ITK-së”- ka shkruar Hakaj. 

Duke kërkuar lirimin nga detyra nga ministri i Kulturës, Hajrulla Çeku, Hakaj thotë se ka ofruar dorëheqjen nga detyra zyrtare për “mosndërmarrjen e veprimeve me kohë dhe për shkak të mosreagimit me kohë ndaj shkelësve të ligjit”. 

Komuna e Prishtinës ka iniciuar kallëzim penal ndaj inspektorit të Inspektoratit për Trashëgimi Kulturore. Kështu ka njoftuar kryetari i Komunës, Përparim Rama, të hënën, më 07.04.2025.

Rama konsideron se që të gjitha projektet transformuese në Prishtinë janë bllokuar dhe ndaluar nga autoritetet e nivelit qendror.

Dy ditë pasi Përparim Rama përuroi fillimin e punimeve për sheshin ‘Xhorxh Bush’ në Prishtinë, Inspektorati për Trashëgimi Kulturore i Ministrisë së Kulturës, Rinisë dhe Sportit vendosi një njoftim për ndalimin e punimeve.

Kjo nuk kaloi pa reagime nga pushteti komunal i Prishtinës, pasi atë ditë, zyrtarë të Komunës, përmes një konference të thirrur për media, paralajmëruan përsëri vazhdimin e punimeve në sheshin “Xhorxh Bush”.

Lajmet e plota mund t’i lexoni në LINK.