IHMK: Temperaturat e larta në Kosovë do të vazhdojnë edhe disa ditë, qytetarët të ruhen nga rrezet direkte të diellit

Instituti Hidrometeorologjik i Kosovës (IHMK) u ka bërë thirrje qytetarëve që të kenë kujdes nga rrezet direkte të diellit, sidomos gjatë intervalit kohor nga ora 10:00 deri në orën 17:00, pasi që indeksi UV ka shënuar vlera të larta.

IHMK tutje ka njoftuar se temperaturat e larta do të vazhdojnë edhe për disa ditë të tjera.

“Përdorni sa më shumë ujë të freskët, jo lëngje të gazuara, kapelë, syze për t’u mbrojtur nga dielli, rroba me ngjyra të lehta nga pambuku ose liri. Të mos konsumojmë ushqime të fërguara, me shumë yndyrë dhe ushqime të shpejta, por sa më shumë ujë të thjeshtë, pemë dhe perime”- thuhet në njoftim.

Po ashtu u është bërë thirrje qytetarëve që mos t’i ndezin hamulloret (serrnishtat), sepse kjo shkakton rritje të temperaturave lokale.

Si dhe është preferuar që të frekuentohen vendet me lartësi, pyjet, kodrinat aty ku ka më shumë qarkullim të ajrit të freskët.

Sipas Besim Aliut nga ky Institut, aktualisht vendi jonë është në dritën e verdhë sa i përket këtyre vlerave të larta të temperaturave, por që sipas tij në ditët në vijim kjo situatë meteorologjike mund të krijojë kushte edhe për alarm të kuq.

Bazuar në konstatimet e Instituti, situata me të nxehtit në vend u krijua si rezultat i masave të nxehta të ajrit me origjinë nga jugu.

“Gjithashtu prezenca e anticiklonit afrikan do të vazhdoj të mbetet i stacionuar mbi vendin tonë edhe në ditët vijuese” – është bërë e ditur nga IHMK.