Gjashtë raste të dhunës në familje në Prishtinë, Kaçanik, Mitrovicë dhe Gjakovë

Policia e Kosovës ka raportuar për disa raste të dhunës në familje që kanë ndodhur gjatë datave 7 dhe 08.10.2025 në disa komuna të vendit, në të cilat viktima në shumicën e rasteve janë gra.

Në Prishtinë, më 07.08.2025, është raportuar një rast dhune, ku një burrë ka sulmuar një grua, me të cilën ishte duke bashkëjetuar. Sipas Policisë, viktima kishte arritur të ikte nga banesa pas dhunës që kishte pësuar, kurse i dyshuari gjendet në arrati, thuhet në raportin policor të datës 09.10.2025.

Një tjetër rast është regjistruar në kryeqytet më 8 tetor rreth orës 00:30, ku një grua ka raportuar se bashkëshorti i saj kishte ushtruar dhunë ndaj saj.  “I dyshuari është arrestuar dhe pas intervistimit me urdhër të prokurorit është liruar në procedurë të rregullt,” – njofton Policia.

Po atë ditë, rreth orës 02:30, është raportuar një rast tjetër dhune në Prishtinë pas një mosmarrëveshjeje. Viktima, një grua kosovare, ka pësuar dhunë nga bashkëshorti i saj dhe ka marrë tretman mjekësor. “I dyshuari gjendet në arrati” – thuhet në raportin 24 orësh.

Edhe në Kaçanik është raportuar për një rast të dhunës në familje që përfshin lëndim të lehtë trupor. Më 8 tetor rreth orës 16:00, Policia ka arrestuar një burrë që dyshohet se kishte sulmuar fizikisht bashkëshorten pas një mosmarrëveshjeje. “Viktima ka pranuar tretman mjekësor. Me vendim të prokurorit i dyshuari është dërguar në mbajtje” – sqaron Policia.

Në Gjakovë, më 8 tetor rreth orës 01:00 të mëngjesit, Policia ka arrestuar një person i cili në gjendje të dehur ka ushtruar dhunë ndaj vajzës së tij.

“Është arrestuar i dyshuari mashkull kosovar, për shkak se në shtëpi në gjendje të dehur kishte ushtruar dhunë fizike dhe ofenduar me fjalë të ndryshme vajzën e tij,” – thuhet në njoftimin e Policisë. Viktima ka refuzuar tretmanin mjekësor, ndërsa “me vendim të prokurorit, i dyshuari është dërguar në mbajtje”.

Një rast tjetër është raportuar në Mitrovicë.

Sipas Policisë, më 08.10.2025 – 00:30 është arrestuar i dyshuari, për shkak se në shtëpi kishte ushtruar dhunë fizike ndaj bashkëshortes së tij.

“Viktima ka pranuar tretman mjekësor, kurse i dyshuari pas intervistimit me vendim të prokurorit është dërguar në mbajtje”- thuhet në raport.