FFK reagon për rastin e Belgin Jasharit i cili dyshohet se u sulmua fizikisht gjatë një ndeshje futbolli
Federata e Futbollit të Kosovës (FFK) ka reaguar për rastin e futbollistit të ri 15 vjeçar Belgin Jasharit, i cili dyshohet se është sulmuar fizikisht gjatë një ndeshje futbolli.
Përmes një komunikate për media, FFK ka thënë se dënon ashpër dhunën fizike dhe verbale ndaj futbollistit Jashari.
“FFK i qëndron pranë Belginit dhe çdo sportisti që përballet me padrejtësi të tilla. Jemi të vendosur të mbrojmë të drejtat e të gjithë futbollistëve tanë dhe, në vazhdimësi, punojmë për një ambient të lirë nga diskriminimi dhe paragjykimet” – thuhet në reagim.
FFK ka thënë se në bashkëpunim me klubin e futbollit “Fushë Kosova”, gjatë javës së ardhshme do të zhvillojë disa aktivitet në mbështetje të Belgin Jasharit, ndërsa ai do të vizitohet edhe nga presidenti Agim Ademi.
Në media në Kosovë është raportuar se Belgin Jashari futbollist i KF “Fushë Kosova”, është sulmuar fizikisht gjatë një ndeshje futbolli, nga një prind i një futbollisti tjetër.
