Berlin mbështet Trumpin për ngritjen e shpenzimeve për NATO-n në 5%

Gjermania ka shprehur të enjten, më 15.05.2025, mbështetje për kërkesën e presidentit amerikan Donald Trump për dyfishimin e shpenzimeve të Mbrojtjes të NATO-s prej 5% të prodhimit të brendshëm bruto, ndërsa Uashingtoni u ka kërkuar vendeve anëtare të eliminojnë çdo “lidhje të dobët” në aleancë, të shkaktuar nga mungesa e investimeve ushtarake – raporton Reuters.

“Ne po ndjekim atë (Trumpin) dhe e shohim këtë si zotim të qartë nga Shtetet e Bashkuara ndaj Nenit 5 të NATO-s.” – ka deklaruar ministri i ri i Jashtëm i Gjermanisë, Johann Ëadephul, duke iu referuar paktit të Mbrojtjes së ndërsjellë të aleancës ushtarake.

Wadephul, i cili mori detyrën në fillimjavën e kaluar si pjesë e Qeverisë së re të udhëhequr nga konservatorët, ka folur në një takim të Ministrave të Jashtëm të NATO-s në qytetin turk, Antalia, ku shpenzimet e Mbrojtjes zunë vendin qendror të agjendës.

Objektivi aktual i shpenzimeve të Mbrojtjes i NATO-s është 2% e PBB-së – një cak që aktualisht është përmbushur ose tejkaluar nga 22 nga 32 anëtarët e saj. Por, shumë udhëheqës të NATO-s thonë se ky objektiv tani është shumë i ulët, pasi e shohin Rusinë si kërcënim shumë më të madh pas pushtimit të Ukrainës në vitin 2022.

Gjashtë javë para Samitit të udhëheqësve të shteteve të NATO-s në Hagë, vendet anëtare po përpiqen të përmbushin kërkesat e Trumpit, duke synuar të parandalojnë përsëritjen e kërcënimeve të kaluara nga Presidenti amerikan për tërheqje nga aleanca, ose për dobësim të angazhimit amerikan për Mbrojtjen kolektive.

Shefi i NATO-s Mark Rutte ka propozuar qasje me dy drejtime për përmbushjen e thirrjes së Trumpit për 5%, duke sugjeruar që aleatët të shpenzojnë 3.5% të PBB-së për Mbrojtje dhe t’i ndajnë 1.5% të tjera për çështje që lidhen me sigurinë, siç janë: infrastruktura dhe siguria kibernetike.

Takimi i së enjtes ishte mundësia e parë për Ministrat e Jashtëm për diskutimin e propozimit.

Përgatiti: Rexhep Maloku – KALLXO.com