Avancohen dekani i Fakultetit të Edukimit Fizik dhe gruaja e prorektorit të UP-së
Florian Miftari, dekani i Fakultetit të Edukimit Fizik dhe Sportit në Universitetin e Prishtinës është avancuar nga profesor asistent në profesor i asociuar.
Avancimi i Miftarit u votua nga senatorët në mbledhjen e Senatit të UP-së më 30.09.2025, por Miftari e lëshoi mbledhjen para se të votohej avancimi i tij, për shkak të konfliktit të interesit.
Në Fakultetin e Edukimit Fizik dhe Sportit po ashtu u rizgjodh asistent Kushtrim Berisha.
Kurse, Florina Jerliu, profesoreshë në Fakultetin e Arkitekturës dhe gruaja e Naim Jerliut, prorektorit për mësimdhënie, çështje të personelit akademik, u avancua nga profesoreshë e asociuar në profesoreshë e rregullt.
Jerliu është edhe senatore, andaj e lëshoi mbledhjen e Senatit të datës 30.09.2025 në pikën kur u votua avancimi i saj. Por, bashkë me të, mbledhjen e lëshoi edhe prorektori Naim Jerliu.
Arta Xhambazi, prodekania për infrastrukturë dhe financa në Fakultetin e Arkitekturës, u avancua nga profesoreshë asistente në profesoreshë e asociuar.
Këto janë avancimet dhe rizgjedhja e parë që miratohen në Senatin e UP-së që kur e miratuan, më 30.04.2025, Rregulloren e re për procedurat përzgjedhëse lidhur me emërimin, avancimin dhe rizgjedhjen e personelit akademik në UP.
Në mbledhjen e Senatit të datës 30.09.2025 u votuan edhe disa pika të tjera, në mesin e tyre edhe përjashtimi i revistës International Journal of Biomedicine (IJBM – Revista ndërkombëtare për Biomjekësi) nga lista e revistave të njohura në UP.
U votua emërimi i komisionit për hartimin e Rregullores për parandalimin e plagjiaturës.
Sipas nenit 75 të Statutit të UP-së, Senati duhet të nxjerrë rregullore të veçantë me të cilën përcakton kushtet, procedurat dhe mënyrat e parandalimit të plagjiaturës për temat e diplomës të studimeve themelore, master dhe doktoraturë.
Po ashtu, u miratua emërimi i komisionit për hartimin e udhëzuesit për testet pranuese, që synon t’i përcaktojë parimet në të cilat duhet të ndërtohen testet pranuese.
Sipas rektorit Arben Hajrullahu, udhëzuesi është një prej standardeve që kërkohet nga procesi i akreditimit të programeve të studimeve. Ai tha se Fakulteti i Edukimit në UP veçse ka një udhëzues të tillë.
“Synon të largohen testimet e të mësuarit mekanik… Udhëzuesi do të jetë obligativ për të gjitha komisionet akademike.” – tha Hajrullahu.
Senatorët miratuan kërkesën e Parlamentit Studentor për ulje të kushtit 10% për regjistrim të vitit vijues për studentët e vitit të parë. Si dhe, u votua me këtë rast që të shtyhet për pesë ditë afati për regjistrim të vitit akademik 2025/2026.
Këshilli i Etikës i UP-së u plotësua me anëtarin Shemsi Krasniqi, pas dorëheqjes së Qëndrim Gashit.
