Asamblisti i VV-së pretendon se persona të panjohur i kanë vënë flakën banerit të Albin Kurtit në Skenderaj

Asamblisti i Vetëvendosjes në Komunën e Skenderajt, Hysni Mehani, ka publikuar pamje në Facebook përmes të cilave ka pretenduar se persona të panjohur i kanë vënë flakën banerit të kryeministrit Albin Kurti, në Skenderaj.

Në një përgjigje për KALLXO.com, Mehani ka thënë se është nuk është hera e parë që ka ndodhur një gjë e tillë gjatë kësaj fushate dhe sipas tij, rasti është raportuar në Policinë e Kosovës.

“Nuk është hera e parë që ka ndodhur, e kemi raportu rastin edhe në Polici, por deri tash nuk ka ndodhë asgjë. Baneri është i kryeministrit Kurti dhe është i vendosur në pronë private të një aktivisti të Vetëvendosjes” – ka thënë Mehani.

Në postimin në Facebook, Mehani ka thënë se Policia e Kosovës, KQZ, KKZ e vëzhguesit të huaj e vendor, sipas tij, duhet ta ndalin ‘këtë presion ndaj një familje që ka vendosur të shpreh lirshëm bindjet e saj politike’.

KALLXO.com ka provuar të kontaktojë me Policinë e Kosovës për të kuptuar nëse është inicuar rasti, por Policia nuk ka kthyer ende përgjigje.