Arrestohet një person në Gjilan, i konfiskohen mbi 100 mijë euro që dyshohet të jenë të falsifikuara

Një person është arrestuar, më 09.12.2024, në Gjilan nën dyshimin ‘për kryerje të veprave: falsifikim i parasë e pastrim i parasë’.

Policia e Kosovës ka njoftuar se është ndaluar automjeti me targa vendore, të cilin ishte duke e drejtuar i dyshuari – ku janë gjetur e konfiskuar 105 mijë euro

Për të njëjtat, Policia ka bërë të ditur se ekziston dyshimi se janë para të falsifikuara.

“Në lidhje me rastin është kryer kontrolli i shtëpisë së të dyshuarit, ku është gjetur makina për numërimin e parave. Në këtë rast, në total janë sekuestruar provat si, në vijim: 100,000.00 euro kartëmonedha, nga 200 euro; 5000.00 euro kartëmonedha, nga 100 euro; 1 makinë për numërimin e parave, 3 telefona celularë.” – thuhet në njoftim.

Lidhur me rastin, me vendimin e prokurorit, i dyshuari i lartcekur dërgohet në mbajtje për 48 orë – nën dyshimin ‘për kryerje të veprave: falsifikim i parasë e pastrim i parasë’.