AGK-ja dënon gjuhën e ministrit në detyrë Faton Peci ndaj gazetarit, Ermal Panduri
Asociacioni i Gazetarëve të Kosovës (AGK), e konsideron si të papranueshme dhe e dënon fuqishëm fjalorin e ministrit në detyrë të Bujqësisë, tashmë deputet në Kuvendin e Kosovës, Faton Peci, kundër autorit të emisionit “Debat Plus” në TV Dukagjini, Ermal Panduri.
Sipas reagimit të AGK-së, në një postim në Facebook, Peci e ka quajtur Pandurin “qelbësirë”, dhe ka ngritur hamendësime për pozicionin e tij ekonomik.
“AGK-ja konsideron se kjo është një sjellje e ultë dhe e dëmshme nga një zyrtar i lartë publik. AGK-ja e fton zotin Peci që të ofrojë në mënyrë transparente përgjigje për raportimet rreth keqpërdorimeve të pretenduara në Ministrinë që ka udhëhequr në 4 vitet e fundit”- thuhet në reagim.
Më tej, AGK-ja ka ftuar ministrin në detyrë Peci dhe zyrtarët e tjerë të partisë politike, Lëvizja Vetëvendosje “që të heqin dorë nga praktika e sulmeve dhe denigrimit të gazetarëve, për shkak të punës dhe raportimit të tyre”.
