QKK hapë thirrjen për propozime për edicionin 98 të çmimeve "Oscars"

Pas një pauze dyvjeçare, Kosova synon që këtë vit të propozojë filmin që do të përfaqësojë vendin në edicionin e 98-të të Akademisë Amerikane të Arteve dhe Shkencave të Filmit – “Oscars”.

Për këtë, Qendra Kinematografike e Kosovës ka hapur të hënën, më 07.7.2025, thirrjen për përzgjedhjen e filmit që do të përfaqësojë Kosovën në edicionin e 98-të të çmimeve “OSCARS”, në kategorinë për film ndërkombëtar/gjuhë të huaj.

Sipas njoftimit, në këtë kategori përfshihen filmat e metrazhit të gjatë artistik, dokumentarë dhe të animuar më të gjatë se 40 minuta, që janë shfaqur ose do të shfaqen në kinema apo platformë VOD, për më së paku 7 ditë radhazi, jo më herët se 1 tetor 2024 dhe jo më vonë se 30 shtator 2025.

Gjatë periudhës kualifikuese dhe gjatë shfaqjes në kinema, thuhet më tej nën njoftim, filmi duhet të reklamohet dhe shfrytëzohet në atë mënyrë që konsiderohet normale dhe e zakonshme me praktikat e shpërndarjes së filmave të dedikuar për shfaqje të parë në kinema (theatrical release).

“Filmat të cilët, në një formë apo tjetrën, realizojnë shfaqje publike jo në kinema dhe shpërndarje para shfaqjes kualifikuese, nuk do të merren në konsideratë për çmimet OSCAR. Shfaqje publike jashtë kinemave konsiderohen të jenë (por jo të kufizuara në): transmetimi dhe televizioni kabllor, PPV/VOD, shpërndarje DVD, shpërndarje gjatë fluturimeve ajrore, transmetime në internet, etj.”- thuhet në njoftimin e QKK-së.

Afati i fundit për aplikim është 21 korrik 2025.

Nga 2014, Kosova fitoi të drejtën për të përzgjedhur një film për garën e çmimeve “Oscars” në kategorinë e filmit të huaj. Deri më tani Kosova është prezantuar 9 herë në garën e çmimeve “Oscars”.

Në 2023 dhe 2024, Kosova nuk dërgoi propozimet e saj për “Oscars”, konkretisht për edicione: 96-të dhe të 97-të të këtyre çmimeve.

Edicioni i 98-të i Çmimeve “Oscars” do të mbahet në mars 2026, në Dolby Theatre në Los Angeles të SHBA-ve.

https://kallxo.com/gjate/analize/arsyet-dhe-pasojat-e-vendimit-qe-kosova-te-mos-propozoje-film-per-oscars-2024/