Policia Jep Shifrat e Arrestimeve dhe Dëmtimeve të Sotme

3 persona janë arrestuar e disa makina zyrtare e një civile janë dëmtuar gjatë zhvillimeve të sotme jashtë Kuvendit.

Policia ka dhënë një kronologji të zhvillimeve të sotme brenda e jashtë Kuvendit.

Ajo ka bërë me dije së gjatë kontrolleve në hyrje të Kuvendit ka arrestuar deputetin Ismajl Kurteshi, të cilit më pas i është caktuar paraburgimi, pasi shkeli masën e arrestit shtëpiak duku folur në manifestimin opozitar të së shtunës.

“Zyrtarët policorë kanë ndaluar z.Kurteshi për mosrespektim të arrestit shtëpiak, me rastin e pjesëmarrjes së tij në manifestimin/protestën e datës 12.12.2015 në Gjilan,” thuhet në komunikatën e Policisë së Kosovës.

Policia konfirmon se ka arrestuar edhe deputetin Pal Lekaj, ndërsa njofton se edhe për dy deputetë tjerë që ndodhen në masën e arrestit shtëpiak, ka lajmëruar gjykatën kur i ka hasur në hyrje të Kuvendit. Bëhet fjalë për Fisnik ismailin e Faton Topallin që u paraqitën sot në seancën e legjislativit.

Policia pastaj tregon se lotsjellës është hedhur në sallën e mbledhjeve, në mbledhjen e Kryesisë së Kuvendit dhe në sallën alternative ku vazhdoi mbledhja.

Në komunikatë njoftohet se jashtë Kuvendit një grup prej 150 personash filluan të sillen dhunshëm.

“Si pasojë e dhunës së shfaqur nga ana e protestuesve, në disa lokacione të ndryshme janë dëmtuar pesë (5) vetura zyrtare, njërës prej tyre i është vënë zjarri nga persona të dyshuar. Pas orës 15:00 nga protestues të dhunshëm është hedhur një mjet i dyshuar koktej molotovi drejt një (1) veture të blinduar të PK-se, si dhe janë hedhur mjete të forta drejt dy (2) veturave patrulluese policore të cilat  janë dëmtuar. Po ashtu deri më tani në bazë të informacioneve të deritanishme (16:30) nga protestues të dhunshëm është dëmtuar edhe një (1) veturë civile,” thuhet në komunikatën e policisë.

Policia në komunikatë thotë se ka arrestuar tre protestues.