Planet e KEDS-it
Këto shifra i përmendi George Karagutoff, drejtori menaxhues i KEDS-it gjatë paraqitjes së planit zhvillimor për rrjetin e shpërndarjes së energjisë.
“Sipas këtij plani zhvillimor ne deri në vitin 2025 presim të investojmë deri në 300 milionë euro, me 1,700 transformatorë të rinj, 2 mijë kilometra linja të reja, tensioni i nivelit do të bëhet standard, gjithashtu do të punohet në reduktim të humbjeve teknike prej 15.42 për qind në 9.2 për qind,” tha Karagutoff.
Ai gjithashtu tha se ndërprerjet në rrjet do të jenë minimale, rrjeti i qëndrueshëm dhe kualiteti teknik më i lartë.
Blerand Stavileci, ministër i Zhvillimit Ekonomik tha se duke e ditur se energjia është parakusht për zhvillim ekonomik, atëherë ky program i zhvillimit të KEDS-it dhe shumë fusha të tjera kanë rëndësi jetike për vendin.
“Gjithmonë e kemi thënë dhe po e themi se deri sa të përfundojnë të gjitha këto projekte dhe pas kësaj faze energjia është parakusht i zhvillimit të qëndrueshëm ekonomik. Çka do që flasim, nëse e shohim edhe në tema të ndryshme sektoriale është e pamundur që ato ta arrijnë apo ta plotësojnë vetveten, nëse ne nuk e kemi të zgjidhur problemin e energjisë elektrike,” tha ministri Stavileci.
Sipas Ministrit Stavileci plani i KEDS-it i ka dhënë përgjigje vizionit që është kombinuar në pesë projektet e energjisë.
“Fotografia energjetike e vendit tonë i ka pesë pjesë të mëdha në kuadër të kapaciteteve ekzistuese të gjenerimit që i kemi në ‘Kosova A’ dhe ‘Kosova B’, në kuadër të kapaciteteve të reja që është ‘Kosova e Re’ dhe po ashtu dy të tjerat që lidhen me burimet e ripërtërishme të energjisë dhe zbatimin e masave të efiçiencës,” tha Stavileci
Ndërsa, Enver Halimi, drejtor ekzekutiv i Bordit të KEDS-it, tha se në këtë projekt do të përfshihen të gjitha komunat me qëllim të identifikimit të nevojave të tyre si dhe do të përfshihen të gjitha ato palë të treta që shprehin interes për modernizim të rrjetit të shpërndarjes.
Ky plan zhvillimor paraqet periudhën e investimeve për vitet 2016-2025 dhe parasheh në detaje investimet në secilën lagje të secilit lokalitet të vendit.
Gjatë përgatitjes së këtij plani janë grumbulluar të dhënat e 8,000 transformatorëve ekzistues të shpërndarjes, të dhënat nga 7,800 kilometra linja dhe janë organizuar 100 orë takime dhe punëtori.
