Në ‘Expokos’ Kërkohet Qeveri Stabile
Bekim Xhafa, organizatori i panairit të ndërtimtarisë dhe energjisë “Expokos” dhe drejtori i Congress & Event Organization (CEO), tha në hapje të këtij panairi se qeveria e ardhshme duhet të jetë stabile.
“Mesazhi imë për kryeministrin e ardhshëm është që ne kemi nevojë për një qeveri stabile që e bën punën e vet drejt dhe që i largon barrierat për bizneset”, tha Xhafa, duke e quajtur kryeministër të ardhshëm kandidatin e “Vetëvendosjes” për këtë pozitë Albin Kurtin.
Xhafa më tutje tha se ka pasur tërheqje të kompanive që e kishin në kalendar pjesëmarrjen në “Expokos” pikërisht që sipas tij nuk u krijua një qeveri si duhet.
“ Nga viti 2014 kur mendua që po e krijojmë një qeveri si duhet dhe nuk e bëmë, filloi tërheqja e të gjitha atyre shteteve që kishin EXPOKOS-in në kalendarin e tyre zyrtar, filluan me ndje pasiguri dhe u tërhoqën të gjitha, filluan pastaj edhe investitorët që i kishim ne te konfirmuar ne EXPOKOS me u tërheqë”, tha Xhafa.
Në panair, Albin Kurti se zhvillimi ekonomik do të jetë prioritet i qeverisë së tij.
“Ne do të jemi afër bizneseve, në shërbim të tyre, sepse duam të jemi në funksion të rritjes ekonomike të ndërlidhjes së bizneseve dhe kësisoj të shtohet punësimi dhe të zvogëlohet emigrimi”, tha Kurti.
Kurti mori shembull qeverisjen e “Vetëvendosjes” në Prishtinë si model që do të zbatohet edhe në komunat tjera.
“Besoj që të gjitha gjërat e mira që janë bërë në Prishtinë do të bëhen në të gjitha komunat e Kosovës dhe që të gjitha të këqijat që janë ndalur në Prishtinë, të ndalen në të gjitha komunat e Kosovës”, tha Kurti.
Ndërsa kryetari i Prishtinës dhe kandidati për deputet të “Vetëvendosjes” Shpend Ahmeti u kërkoi bizneseve të pranishme që përshtypjet për Prishtinën t’i shpërndajnë edhe te të tjerët.
“Tashmë Prishtina kërkon që të kthejë vendin e vet në mesin e kryeqyteteve jo vetëm të Ballkanit, por edhe më tutje, ju ftoj që t’i vizitoni pjesët e ndryshme të qytetit, e besoj që pastaj do t’i mbledhni vetë ju pikëpamjet e tuja për Prishtinën dhe pastaj t’i shpërndani me të tjerët”, tha Ahmeti.
KALLXO.com edhe vitin e kaluar shkroi për këtë panair.
http://kallxo.com/mbeshtetje-per-ekonomine-qe-nuk-ndot/
