Matoshi Kërkon Votën për Demarkacion nga të Shkëputurit prej VV-së

Halil Matoshi, këshilltari politik i Kryeministrit Haradinaj, u ka kërkuar votën pro demarkacionit Grupit të Deputetëve të Pavarur

“Krahu i moderuar që u shkëput nga Lëvizja Vetëvendosje, Ymeri, Molliqaj, Sejdiu, Gorani etj. nuk e kanë asnjë arsye sot, as morale dhe as ideologjije, për të mos e votu demarkacionin”, shkroi Matoshi në facebook.

Sipas Matoshit, nëse këta deputetë votojnë pro demarkacionit rreshtohen në mbrojtje të Kosovës.

“Vota për demarkacionin i nxjerr ata nga mistika dhe konspiracioni, në rrafshin e realpolitikës! I ngrit ata mbi interesat partikulare dhe individuale dhe i rreshton në mbrojtje të Republikës!”, vijoi postimi i Matoshit.

Matoshi konstaton se nëse grupi nuk e voton demarkacionin do të jetë vetëm kopje e zbehtë e Vetëvendosjes.

“Ky grup deputetësh që nesër mund të bëhet parti politike, do të vuajë i eklipsuar nga organizata amë dhe nuk do të ketë ofertë politike për qytetarët, por do të mbetët kopje e zbehtë e Lëvizjes!”, shkroi Matoshi.

Dje në Kuvend Visar Ymeri konstatoi se korrigjimet që po thuhen se do t’i bëhen vijës kufitare me Malin e Zi në terren, sipas tij nuk do të korrigjojnë hektarët e humbur.

http://kallxo.com/visar-ymeri-korrektimet-nuk-kthejne-8200-hektare/

Edhe dje para seancës për demarkacionin, Matoshi porositi deputetët që ta votojnë marrëveshjen për vijën kufitare me Malin e Zi.